Русия иҷозатномаи фаъолияти 15 созмони хориҷӣ, аз ҷумла, Amnesty International ва Human Rights Watch-ро бекор кард. Ин хабар дар рӯзи 44-уми ҷанги Русия дар хоки Украина нашр шуд, ки то имрӯз боиси кушта шудани ҳазорҳо нафар гардидааст. Беш аз 11 миллион сокини Украина маҷбур шуданд хонаҳои худро тарк кунанд ва ин боиси эҷоди як бӯҳрони азими паноҳандагон дар Аврупо баъди Ҷанги дуюми ҷаҳон шуд. Amnesty International ва Human Rights Watch дар Русия давоми 30 сол ҳузур доштанд. Ин ду созмон ва 13 ташаккули дигарро вазорати адлия дар “нақзи қонунгузории ҷории Федератсияи Русия” гунаҳор кардааст. Дар миёни созмонҳои басташуда дар Русия дафтарҳои Карнеги Эндовмент барои сулҳи байнулмилал, Бунёди Фридрих Нитсше барои озодӣ ва Бунёди Фридрих Эберт номбар мешаванд. Рейчел Денбер, раҳбари дафтари Human Rights Watch дар умури Аврупо гуфт, шубҳае нест, ки тасмими мақомоти Русия дар вокуниш ба шеваи пӯшиши ҷанги Русия дар Украина гирифта шудааст. Денбер гуфт, ки созмонаш кор дар умури Русияро идома медиҳад. Агнес Калламард, дабири кулли Amnesty International ҳам гуфт, ки созмонаш кӯмакрасонӣ ба шаҳрвандони Русияро идома хоҳад дод.
Русия иҷозатномаи кори Amnesty International ва Human Rights Watch-ро бекор кард
