"Тоҷикистону Қирғизистон дар марз оташбас эълон карданд." Дар ин бора Раҷаббой Аҳмадзода, раиси вилояти Суғд, шаби 28-уми январ ба Радиои Озодӣ хабар дод.
Ӯ гуфт: "Музокироти мо бо раиси вилояти Бодканди Қирғизистон, Абдукарим Алимбоев, ба анҷом расид. Оташбас эълон гардид. Роҳҳо боз шуданд ва низомиён ба қафо кашида мешаванд. Комиссияи муштарак субҳи 28-уми январ таҳқиқро оғоз мекунад."
Содир Жапаров, раиси ҷумҳури Қирғизистон, дар паёме дар Фейсбук навишт, "вазъият дар сарҳад аз дақиқаҳои аввал пурра таҳти назорати ман аст. Худо хоҳад, ҳама чизро бо гуфтушунид ва бо роҳи осоишта ҳал мекунем. Нигарон набошед."
Хадамоти марзбонии Қирғизистон рӯзи 28-уми январ тасдиқ кард, ки мақомоти Қирғизистону Тоҷикистон дар бораи оташбаси комил дар марз ба мувофиқа расиданд. Ба иттилои ин ниҳод, тасмим гирифта шудааст, "ҳарду ҷониб нерӯ ва техникаҳои изофиро аз марз берун баранд, шоҳроҳи Бодканд-Исфанаро пурра бикушоянд ва дар марз посбонии муштарак ташкил кунанд."