17 захмиро дар бемористони Исфара бистарӣ кардаанд
Як мақоми идораи тандурустӣ дар шаҳри Исфара гуфт, ки дар натиҷаи задухӯрди мусаллаҳона дар марзи Тоҷикистону Қирғизистон 17 нафар (аз ҷониби Тоҷикистон) захмӣ шудаанд.
Ҳамсуҳбати мо бе зикри ном гуфт, баъзе аз захмиён низомӣ ва қисми дигар сокинони оддӣ ҳастанд. "Ҳамаи онҳо дар бемористони марказии шаҳри Исфара бистарӣ карда шудаанд," -- афзуд ӯ, аммо тафсилот надод.
Ба иттилои дарёфтӣ, дар миёни захмиён мудири Шуъбаи ташкилии шаҳри Исфара низ будааст. Манобеъ мегӯянд, ӯ аз пойи росташ захм бардошта, дар шуъбаи шикастабандии бемористони марказӣ бистарист.
Маълум нест, ки оё дар шифохонаҳои ҷамоати Чоркӯҳ ва Ворух низ захмиёнро ҷой кардаанд ё не. Мақомоти Тоҷикистон ба таври расмӣ дар ин бора иттилоъ намедиҳанд. Пештар раиси деҳаи Хоҷаи Аълои Исфара дар бораи кушта шудани як сокини 36-сола хабар дода буд.
Вазорати тандурустӣ: Чаҳор низомии Қирғизистон захмӣ шуданд
Мақомоти Қирғизистон гуфтанд, дар задухӯрди мусаллаҳона дар марз бо Тоҷикистон чаҳор низомии он кишвар захмӣ шудаанд. Вазорати тандурустии Қирғизистон хабар дод, ки маҷруҳонро аз деҳаи Куктош ба бемористони вилояти Бодканд бурданд.
Мақомоти Тоҷикистон расман ҳеч иттилое надодаанд.
"Азия-Плюс": Шумораи захмиён ба 11 нафар расид
Бино ба гузориши оҷонси "Азия-Плюс", дар даргирӣ миёни Тоҷикистону Қирғизистон 11 нафар аз ҷониби Тоҷикистон захмӣ шудаанд.
Манбаъ аз қавли масъулони Бемористони марказии Исфара гуфтааст, 8 нафари онҳо низомӣ ва 3 нафар мардуми одӣ ҳастанд. Ду нафари дигар аз сангборон захм бардоштаанд.
Як кушта ва чанд захмӣ
Дар пайи задухӯрди мусаллаҳона дар сарҳади Тоҷикистону Қирғизистон як сокини деҳаи Хоҷаи Аълои Исфара кушта шудааст.
Раиси маҳаллаи Хоҷаи Аълои ҷамоати Чоркӯҳ рӯзи 27-уми январ ба Радиои Озодӣ гуфт, Обидҷон Тӯйчиев 36 сол дошт. "Вай шахси низомӣ набуд, фарди оддӣ буд. Дар наздикии Шуъбаи корҳои дохилии Хоҷаи Аъло аз тири нерӯҳои Қирғизистон кушта шудааст," -- нақл кард ӯ.
Хабаргузории "Азия-Плюс" аз қавли манбааш навишт, ки ин сокини Хоҷаи Аъло "дар натиҷаи афтодани мушак (снаряд) ба хонааш ҷон бохт."
Зубайдулло Шомадов, сухангӯйи ҳукумати Исфара, кушта шудани Обидҷон Тӯйчиевро тасдиқ кард, аммо тафсилот надод.
Хабаргузории "Азия-Плюс" мегӯяд, то кунун 6 захмӣ аз ҷониби Тоҷикистон дар бемористони марказии Исфара бистарӣ карда шудаанд. Ду нафари онҳо низомӣ будаанд.