Хабаргузории расмии ТАСС менависад, дар паи як муноқиша дар минтақаи Новая Москва афроди номаълум ба шаҳрвандони Тоҷикистон ҳамла карданд ва дар натиҷа, се нафар маҷрӯҳ ва як шаҳрванди Тоҷикистон кушта шудааст. Ин хабаргузорӣ бо такя ба манобеи худ дар сохторҳои тафтишотӣ менависад, ки ба ин нафарон бо корду силоҳ ҳамла кардаанд. Як манбаъ гуфтааст, ки ҳодиса шаби 27-уми март дар минтақаи Новая Москва рух дод. Ӯ гуфтааст: “Дар суроғаҳои мухталиф ҳамла ба ҳадди аққал чор шаҳрванди Тоҷикистон рух дод. Се нафарашон бо корд захмӣ шуда, ду нафарашон инчунин аз тири туфанг ҳам маҷрӯҳ шуданд. Инчунин мошине пайдо шуд, ки дар дохилаш ҷасади инсон бо ҷароҳатҳои корд буд”. ТАСС мегӯяд, ки ходимони ҳифзи қонун тахмин мекунанд, ки ин қазия ба моҷарое дар ҳудуди бозори азими “Фуд Сити” рабт дорад, ки дар Калужское шоссе ҷойгир аст.
Дар навиштаи хабаргузориҳои дигар, аз ҷумла news.rambler.ru омадааст, ки дар бахши кишоварзии бозори “Фуд Сити” шаби шанбеи гузашта миёни “гурӯҳҳои ҷиноии иборат аз сокинони Доғистон ва Тоҷикистон низоъ бархост”. Телеграм-канали “База” гуфтааст, ки ба ҷои ҳодиса тахминан 200 корманди ҳифзи қонун сафарбар шуд ва таҳқиқи ин ҳодиса ба роҳ монда шудааст. Ин манбаъ гуфтааст, ки чор нафар бо гумони даст доштан дар ин моҷаро мавриди пайгард қарор дода шудаанд.
Ҷузъиёти дигари ҳодиса феълан дар даст нест. Мақомоти тоҷик ҳанӯз ин қазияро шарҳ надодаанд.
