Раҳматулло Зоиров, раиси Ҳизби сотсиал-демократи Тоҷикистон мегӯяд, баъди эълони мукофот барои пайдо кардани сагаш даҳҳо нафар ӯро таънаву маломат кардаанд, ки чаро барои як ҷонвар чунин ҳаёҳу бардошт. Раҳматулло Зоиров дар муроҷиатномае дар Фейсбук гуфтааст, ки азбаски сагаш бо номи Ҷозибаро аз хурдӣ бузург карда буд, ин ҷонвар мисли падару модар ва дӯсту бародараш ҳаст.
Раҳматулло Зойиров навиштааст, сагаш ҳатто ду маротиба ӯро аз марг наҷот додааст ва то кунун ҳеҷ яке аз сокинони маҳалли зисташонро ҳам озор надодааст. Раҳматулло Зойиров навиштааст, ки бо ин саг худро бахтиёр меҳисобид. Саги раиси Ҳизби сотсиал демократи Тоҷикистон ба гуфтаи худаш шаби 10-уми март аз хонааш рабудаанд ва ҷустуҷуҳои зиёд натиҷае надодаанд. Раҳматулло Зоиров барои пайдо кардани ӯ 1500 сомонӣ подош таъйин кардааст.
Ҷозиба аз зоти овчаркаи осиёимиёнагӣ буда 27 моҳ дорад ва аз якмоҳагӣ дар тарбияи Зоиров буд.
Маҳмурод Одинаев, яке дӯстони Зоиров, ки дар ҷустуҷӯи саг ба ӯ кумак мекунад, рӯзи 14-уми март дар суҳбат бо Радиои Озодӣ дар ин робита гуфт:
“Бечора устод аз шаб то саҳар дар ҷустуҷӯи саг аст. Ӯ хислати нарме дорад ва бо сагаш унс гирифта буд. Онро аз хурдӣ парвариш кардааст. Ин саг ёвару посбонаш буд. Ҳар гоҳе бо ин саг ба кӯча мебаромад, касе ба ӯ наздик шуда наметавонист".
