Нурбибӣ Мансурова, як шаҳрванди Тоҷикистон, ки мегуфт, дар хонаи марди арабе зери шиканҷа қарор дорад, шаби шанбе ба якшанбе аз Арабистони Саудӣ ба Тоҷикистон расидааст. Ин зан душанбеи 9-уми октябр дар сӯҳбати телефонӣ бо Радиои Озодӣ гуфт, ки пас аз расидан ба Тоҷикистон, кормандони ВКД бо ӯ суҳбати кутоҳ анҷом доданд ва сипас ӯ ба дидори хонаводааш ба Восеъ рафт. Ин зан гуфт, ки баъди дидор бо фарзандон, ҳоло ба Душанбе раҳсипор аст ва ӯро барои сӯҳбат ба Вазорати корҳои дохилӣ Тоҷикистон даъват кардаанд.
Ӯ афзуд, умед надошт, ки аз хонаи араб раҳо шавад, аммо бо кӯмаки кормандони сафорат ва ВАО, тавонист ба дидори наздиконаш бирасад. "Ман аз ҳамаи он афроде, ки барои раҳоии ман кӯшиш карданд, миннатдорам. Шаби якшанбе ман ба хонаам расида омадам. Маро кормандони Вазорати корҳои дохила пешвоз гирифтанд. Баъди сӯҳбат бо кормандони милиса, ман ба Восеъ омадам ва имрӯз даъват шудам, ҳоло дар роҳ ба сӯи Душанбе ҳастам",--гуфт Нурбибӣ Мансурова ба Радиои Озодӣ
Нурбибӣ Мансурова, сокини ноҳияи Восеи вилояти Хатлон ду ҳафтаи қабл дар як тамоси видеоӣ бо Радиои Озодӣ гуфт, гӯё ширкати “Имкон-2015” бо роҳи фиреб ӯро ба Арабистони Саудӣ бурдаааст ва ӯ дар хонаи корфармо чун ғулом ба сар мебарад. Нурбибӣ Мансурова гуфта буд, соҳибхоназан бо духтараш рӯзе нест, ки ӯро зери латту кӯб қарор надиҳанд.
Нурбибӣ Мансурова дар шаҳри Ал-Қурияи Садиқаи Ас-Сафири Арабистони Саудӣ дар хонаи марди арабе хидматкор буд. Ин зан дар ҳоле ба ватан оварда баргаштш, ки Додситонии кул нисбат ба ширкате, ки ӯро барои кор ба Арабистони Саудӣ фиристод, парвандаи ҷиноӣ боз кардааст.
