Ҳукумати маҳалии Каталония дар Испания мегӯяд, дар ҳамапурсии ин минтақа барои истиқлол, ки ҳукумати марказӣ онро ғайриқонунӣ хонда буд, беш аз 40 дарсади афроде, ки ҳаққи додани раъй доштанд, ширкат карданд ва 90 дарсади онҳо хостори ҷудоӣ аз Испания шудаанд.
Ҳамапурсии рӯзи 1-уми октябр дар Каталония дар ҳоле баргузор шуд, ки ҳукумати Испания онро ғайриқонунӣ эълон карда буд ва пулис барои пешгирӣ аз баргузории он, даҳҳо ҳавзаҳои раъйдиҳиро баст. Аз сӯи дигар, дар даргириҳои рӯзи якшанбеи 1-уми октябр байни нерӯҳои амниятӣ ва эътирозгарон, садҳо нафар захмӣ шуданд. Дар пайи ин ҳодиса ҳукумати маҳаллии Каталония ҳушдор дод, ки парвандаи ин ҳодисаҳоро ба "додгоҳҳои байналмилалӣ" мебарад.
Рӯзи 2-юми октябр сухангӯи ҳукумати маҳаллии Каталония эълон кард, ки 2,24 миллион нафар дар ин ҳамапурсӣ ширкат карданд ва аз он ҷиҳат, ки афроди дорои ҳаққи раъйдиҳӣ 5,2 миллион нафар ҳисоб шуда буд, ин рақам ба маънии ширкати 42 дарсади дар раъйгирӣ аст.
Браузери шумо HTML5-ро намешиносад
Раҳбари Каталония Испанияро бо истифодаи ноодилонаи нерӯ муттаҳам кард
Карлес Пучдемон, раиси ҳукумати маҳаллии Каталония дар як суханронии телевизионӣ гуфтааст, "дар ин рӯзи умед ва андӯҳ, шаҳрвандони Каталония ҳаққи истиқлолро барои ташкили як ҷумҳурии мустақил ба даст оварданд". Пучдемон мегӯяд, "дар рӯзҳои оянда ҳукумати ман натиҷаҳои раъйгириро ба порлумон мефиристад...то бар асоси қонун, ҳамапурсӣ амалӣ шавад."
Ҳукумати марказии Испания мегӯяд, ҳамапурсӣ хилофи Қонуни асосии он кишвар аст. Мариниа Рахой, нахуствазири Испания шаби гузашта гуфт, ҳамапурсӣ ғайриқонунӣ аст ва афзуд, аз нигоҳи ӯ дар ин минтақа барои истиқлол раъйгирӣ нашудааст. Оқои Рахой бидуни ироаи ҷузъиёте гуфтааст, ки аксарияти бузурги мардуми сокини шимол-шарқи Испания, хостори ҷудоӣ нестанд.
Мақомҳои маҳаллии Каталония мегӯяд, ки ҳадди ақал 840 нафар дар пайи даргирӣ ва хушунатҳои рӯзи якшанбе, ба бемористонҳо муроҷиат кардаанд. Вале маълум нест, ки чӣ қадар аз эътирозгарон ба таври ҷиддӣ захмӣ шуда ва ё дар бемористонҳо бистарӣ шудаанд. Дар ҳамин ҳол пулиси Испаният эълом кардааст, ки 33 нафар аз кормандон пулис ҷароҳат бардоштаанд.
Аксҳо аз ҳамапурсӣ дар Каталония