Чунонки сомонаи расмии Федератсияи байналмилалии ҷудо (IJF) қаблан хабар дода буд, дар мусобиқоти “Zagreb Grand Prix 2023” Тоҷикистонро мебоист панҷ варзишгар - Муҳаммадсолеҳ Қувватов (-60 кг), Меҳрзод Суфиев (-60 кг), Обид Ҷебов (-66 кг) ва Ҷаҳонгир Маҷидов (-90 кг) - намояндагӣ мекарданд, вале бо сабаби мушкили раводид, танҳо ду нафар - Обид Ҷебов ва Ҷаҳонгир Маҷидов – иҷозати сафар ба Хорватияро гирифтанд.
Мусобиқот аз рӯи ҳафт вазн миёни мардон ва ҳафт вазн байни занон сурат мегирад. Маросими қуръакашии мусобиқот шоми панҷшанбеи 17-уми август доир мегардад.
Ба иттилои сомонаи расмии Федератсияи байналмилалии ҷудо (IJF), дар мусобиқоти “Zagreb Grand Prix 2023” иштироки 532 варзишгар (318 мард ва 214 зан) аз 84 кишвари панҷ қораи олам дар назар аст.
Рӯзи аввали мусобиқот – 18-уми август – қувваозмоиҳо дар вазнҳои -60 кг, -66 кг миёни мардон ва -48 кг, -52 кг, -57 кг миёни занон баргузор мешавад. Рӯзи дувуми мусобиқа – 19-уми август - гуштигирони вазнҳои -73 кг, -81 кг байни мардон ва -63 кг, -70 кг миёни занон рақобат мекунанд. Мусобиқот 20-уми август бо қувваозмоиҳо дар вазнҳои сангин -90 кг, -100 кг, +100 кг миёни мардон ва -78 кг, +78 кг байни занон - ба поён мерасад.
Ба варзишгарон дар ин мусобиқоти байналмилалӣ ба ҷуз аз медалу имтиёзҳо ҷоизаҳои молӣ тақдим мегардад. Дар ҳар як вазн ба ғолиб 3000 евро, барои ҷойи дувум 2000 евро ва барои ҷойҳои севум 1000-евроӣ супурда хоҳад шуд.