Дар чанд ҷумла
Шуҷоати Парасту. Консерти бидуни ҳиҷоб дар Эрон ва парвандаи ҷиноӣ
Барномаи ҳунарии овозхон Парасту Аҳмадӣ бидуни ҳиҷоби маҷбурӣ дар Эрон дар сархати хабарҳо ҷой гирифт.
"Консерти корвонсаро" шаби 11-уми декабр ба таври зинда дар Интернет пахш шуд. Ҳазорон кас онро тамошо карданд.
Аҳмадӣ бо либоси китфаш бози аврупоӣ ҳозир шуда, бо ёрии гурӯҳе аз ҳунармандон таронаҳои машҳури эрониро замзама кард.
Ин барнома дар як корвонсарои қадимӣ дар яке аз даштҳои Эрон барпо шудааст.
Дар ҳоле ки бисёре аз корбарони шабакаҳои иҷтимоӣ аз шуҷоати ӯ ситоиш карданд, мақомоти ҳифзи ҳуқуқи Эрон гуфтанд, ки зидди ӯ парвандаи ҷиноӣ боз шудааст.
Радиои Фардо, бахши эронии Радиои Озодӣ, навишт, марги Маҳсо Аминӣ ва эътирози "Зан, зиндагӣ, озодӣ" бисёре аз занону духтарони ҳунармандро ба майдон баровард, ки аз ҳиҷоби маҷбурӣ ва поймоли ҳуқуқи инсон дар Эрон норозиянд.
Бисёре аз корбарони шабакаҳои иҷтимоӣ Парасту Аҳмадиро ҳам як намунае аз муборизаи занон барои озодиву ҳуқуқашон донистаанд.
Амрико ба зидди мақомоти Гурҷистон маҳдудияти нав ҷорӣ кард
Иёлоти Муттаҳида дар мавриди додани виза ё раводиди сафар ба мақомоти Гурҷистон маҳдудият ҷорӣ кард.
Департаменти давлатӣ ё Вазорати корҳои хориҷии Амрико рӯзи 12-уми декабр гуфт, “судури виза барои касоне, ки масъул ё шарики суст кардани демократия дар Гурҷистон ҳастанд, манъ хоҳад шуд."
Танишҳо дар Гурҷистон пас аз эъломи пирӯзии ҳизби ҳокими "Орзуи гурҷӣ" дар интихоботи порлумонии 26-уми октябр боло гирифт.
Мухолифон ва раисҷумҳури ғарбгарои Гурҷистон, Саломе Зурабишвили, гуфтанд, ки дар ин маърака бо мадади Маскав тақаллуб сурат гирифтааст.
Баъди он ки ҳукумати Гурҷистон рӯзи 28-уми ноябр музокиротро дар бораи пайвастани Гурҷистон ба Иттиҳоди Аврупо то соли 2028 боздошт, эътирозгарони зиёд ба хиёбонҳои пойтахт, Тбилиси, баромаданд.
Мақомот барои пароканда кардани онҳо аз зӯр ва обу гази ашковар истифода карданд.
Иёлоти Муттаҳида рӯзи 4-уми декабр аз ҳукумати Гурҷистон талаб кард, ки бо мардуми норозӣ боэҳтиромона муносибат кунад.
Гукеш ҷавонтарин қаҳрамони шоҳмоти ҷаҳон шуд
Гроссмейстери байнулмилалӣ Гукеш Доммараҷу аз Ҳиндустон дар мусобиқаи қаҳрамонии шоҳмоти ҷаҳон дар Сингапур бар Динг Лирен аз Чин пирӯз шуд.
Рақобати ниҳоӣ, ки Доммараҷу бо донаҳои сиёҳ бозӣ мекард, бо пирӯзии ӯ анҷом ёфт. Натиҷаи ниҳоии бозӣ 7,5:6,5 ба фоидаи Доммараҷу шуд.
Доммараҷу 18 сол дорад ва ҷавонтарин қаҳрамони ҷаҳон дар риштаи шоҳмоти классикӣ гардид. Вай пас аз Вишванатан Ананд дуюмин қаҳрамони ҷаҳон аз Ҳиндустон аст. Дарвоқеъ, Ананд, ки қаҳрамони 15-уми ҷаҳон аст, мураббии Гукеш мебошад.
Насибҷон Амонӣ, рӯзноманигор ва шореҳи шоҳмот, гуфт, ки пеш аз ду бозии асосии ниҳоӣ қаҳрамони ҷаҳон Динг Лирен бартарии равонӣ ва имкони бештаре барои дар даст нигоҳ доштани тоҷи шатранҷро дошт.
Вай афзуд, “бисёриҳо акнун бар ин бовар буданд, ки чун Динг Лирен бозии 13-умро бо донаҳои сиёҳ мусовӣ анҷом дод, барои дастёбӣ ба ҳадафи ниҳоӣ басо наздик шуд, зеро дар бозии охирин ӯ донаҳои сафедро дар ихтиёр дошт. Вале дар охири бозии ниҳоӣ, ки шатранҷбози чинӣ ҳарчанд як пиёда камтар дошту вале ҳама натиҷаи онро мусовӣ мегуфтанд, ба иштибоҳ роҳ дода, дар ҳаракати 59-ум таслим шуд.”
Ба ин тартиб, Гукеш баробари соҳиб шудан ба унвони қаҳрамонӣ, ҳамчунин дар таърихи шоҳмоти ҷаҳон рекорди наве гузошт: ӯ нахустин шатранҷбозе гардид, ки дар 18-солагӣ шоҳи шатранҷи ҷаҳон шуд.
Зеленский ҳамлаҳои охири Русияро "террор" хонд
Русия рӯзи 13-уми декабр бо истифода аз даҳҳо мушак ва ҳавопаймоҳои бесарнишин ба гӯшаҳои Украина, аз ҷумла зербиноҳои энержии ин кишвар ҳамла кард.
Дар шаҳри ҷанубии Одесса чанд таркиш ба вуқуъ пайваст.
Владимир Зеленский, раисҷумҳури Украина, ҳамларо “террор” хонд.
Вай дар изҳороте гуфт, ин вазъ баёнгари он аст, ки президенти Русия Владимир Путин “бо гапи хушку холӣ” аз роҳаш намегардад.
Тибқи гузоришҳои ибтидоӣ, Русия дар ин рӯз ба хоки Украина 93 мушак, аз ҷумла як мушаки Куриёи Шимолӣ ва ҳудуди 200 ҳавопаймои бесарнишин сар додааст.
“Укрэнерҳо”, ширкати таъминкунандаи барқ, пештар хабар дода буд, ки ҳамлаҳо сабаби маҳдудияти барқ дар саросари Украина гаштанд.
Аз 100 сомонӣ то бузу гӯсфанд. Мавсими нави бузкашӣ дар Хатлон
Мавсими нави бузкашӣ, ки ҳоло дар Тоҷикистон як навъ варзиш медонанд, дар вилояти Хатлон оғоз ёфт. Ин маърака то ҷашни Наврӯз идома хоҳад кард.
Човандозҳои маҳаллӣ бо ҳаводорони худ ҳафтаи гузашта дар майдони бузкашӣ дар ноҳияи Фархор ҷамъ омаданд.
Дар миёни онҳо Нодир Тешаев яке аз ботаҷрибатаринҳост. Бо вуҷуди он ки чанд дафъа тасмим гирифт, бузкаширо тарк кунад, мухлисонаш ӯро аз саҳна дур шудан намемонанд.
“Бузкашӣ чизе надодааст, ба ҷуз шуҳрат ва ёру рафиқдорӣ. Ҳар заҳмате, ки човандоз мекашад, танҳо барои мухлисонаш аст,” – гуфт Нодир Тешаев.
Видеоро дар инҷо бинед:
Ҷоизаҳои бузкашӣ аз 100 сомонӣ сар шуда, то бузу гӯсфанд иборат буданд. Ҳар човандоз талош мекард, соҳиби ҷоиза шавад. Тамошобинон човандози дӯстоштаи худро ташвиқ мекарданд.
Дар Тоҷикистон ҳар сол дар фасли зимистон бузкашӣ ташкил мешавад. Ин маросим дар ноҳияҳои гуногун то Наврӯз идома мекунад.
Аксҳои бештар:
Мавсими нави бузкашӣ дар Хатлон
Блинкен дар Анқара бо Эрдуғон мулоқот кард
Энтони Блинкен, вазири корҳои хориҷии Амрико, ки ба Ховари Миёна сафар кардааст, рӯзи 12-уми декабр аз Урдун вориди Анқара шуд ва дар фурудгоҳи "Esenboga"-и пойтахти Туркия бо Раҷаб Таййиб Эрдуғон дидор ва гуфтугӯ кард.
Меҳвари гуфтугӯҳои ду тараф таҳаввулоти Сурия буд. Ба навиштаи "Рейтерз", ин дидор дар ҳоле анҷом шуд, ки шимоли Сурия дар рӯзҳои охир шоҳиди даргириҳое байни курдҳои мавриди ҳимояти Амрико ва нерӯҳои мавриди ҳимояти Туркия буд.
Бино ба баёнияи дафтари раисҷумҳури Туркия, Раҷаб Таййиб Эрдуғон дар ин мулоқот таъкид кардааст, ки кишвараш "барои амнияти миллии худ" чораҳои пешгирона дар Сурияро алайҳи ҳамаи "гурӯҳҳои террористӣ" анҷом хоҳад дод.
Ӯ ҳамчунин аз ҷомеаи байнулмилалӣ хост, барои бозсозии ниҳодҳо дар Сурия бо якдигар ҳамкорӣ кунанд.
Аз сӯи дигар, Энтони Блинкен эълон кард, ки бо раисҷумҳури Туркия дар бораи "амнияти минтақаӣ ва интиқоли сиёсӣ дар Сурия", гуфтугӯ кардааст.
Ӯ дар шабакаи иҷтимоии "Х" навишт, раванди интиқол дар Сурия бояд "таҳти раҳбарии Сурия" ва "шомили ҳамаи суриягиҳо" бошад ва аз ҷони ғайринизомиён муҳофизат шавад.
Дар ҳамлаҳои Исроил 27 кас дар Ғазза кушта шуд
Мақомҳои тандурустӣ дар Фаластин мегӯянд, ки дар ҳамлаи ҳавоии Исроил дастикам 27 нафар, ба шумули 7 кӯдак дар Ғазза кушта шуданд.
Ба гузориши хабаргузории "Рейтерз", ин ҳамла чанд соат пас аз қабули қатъномае дар Маҷмаи умумии СММ сурат гирифт, ки дар он оташбаси фаврӣ дар Ғазза дархост шудааст.
Дар яке аз ҳамлаҳое, ки шаби чаҳоршанбе то рӯзи панҷшанбе анҷом шуд, як хона дар паноҳгоҳи "Ан-Насирот" ҳадаф қарор гирифтааст.
Аз ин ҷумла, бемористони "Шуҳадои Ал-Ақсо" дар наздикии шаҳри Ал-Балаҳ хабар додааст. Кушташудагон ва захмиёни ҳодиса ба ин бемористон интиқол дода шуданд.
Дар ду ҳамлаи дигар 15 тан аз афроде, ки аъзои кумитаҳои маҳаллӣ буданд, кушта шудаанд. Ин кумитаҳо ба ҳадафи ҳифозати корвонҳои ҳомили кумакҳо таъсис дода шудаанд.
Дар қатъномае, ки рӯзи чаҳоршанбе аз сӯи Маҷмаи умумии СММ қабул шуд, аз идораҳои Созмони Милал дар умури паноҳандагон ҳимоят шудааст. Исроил фаъолияти ин идораро манъ кардааст.
Мақомот мегӯянд, беш аз 112 ҳазор оилаи камбизоат кӯмак гирифтанд
Вазорати тандурустӣ ва ҳифзи иҷтимоии аҳолӣ мегӯяд, аз оғози сол ба беш аз 112 ҳазору оилаҳои камбизоат дар Тоҷикистон ба маблағи 67 миллиону 613 ҳазору 400 сомонӣ кӯмаки яквақта расонида шуд.
Ба иттилои манбаъ, ба гурӯҳҳои гуногуни оилаҳои камбизоат дар ҳаҷми 600 сомонӣ кӯмаки яквақта супорида шуд.
Ин маблағҳо дар доираи "Лоиҳаи навсозии ҳифзи иҷтимоӣ ва ҳамгироии иқтисодӣ" будааст, ки тавассути грантҳои байнулмилалӣ маблағгузорӣ мешавад.
Кӯмакпулӣ асосан ба шахсоне дода мешавад, ки дар рӯйхати шахсони камбизоати ҷамоатҳои деҳот, номашон сабт шудааст.
Ҳарчанд на ҳама шахсони камбизоат ба гуфтаи худашон, метавонанд дар ин рӯйхат сабти ном шаванд.
Созишнома дар хусуси ин тарҳ бо Ассотсиатсияи байнулмилалии рушд ба маблағи 35 млн доллар, моҳи июни соли 2023 ба имзо расида буд.
Як зодаи вилояти Бадахшон дар ҷанг дар Украина кушта шудааст
Тобути як зодаи шаҳри Хоруғ (ВМКБ)-ро, ки дар ҷанги Русия алайҳи Украина кушта шудааст, рӯзи 12-уми декабр аз Маскав ба Тоҷикистон фиристоданд.
Файзулло Бодуров 40 сол дошт.
Шахсони наздик ба ӯ гуфтанд, ки Бодуров аз тарафи мақомоти Русия ва “бо шарти таслим таслим накарданаш ба Тоҷикистон ба ҷанги зидди Украина бурда шуда буд”.
Яке аз онҳо (ба далели амниятӣ номаш фош намешавад) гуфт, Бодуров дар Тоҷикистон бо иттиҳоми тундгароӣ бо истифода аз Интернет (моддаи 307-и Кодекси ҷиноӣ) таҳти пайгард қарор дошт.
“Ҷониби Русия бо ин шарт, ки агар ба ҷанги Украина равад, истирдод нахоҳад шуд, ӯро ба Украина бурданд. Хабари кушта шуданаш рӯзи 15-уми ноябр расид,” – гуфт ҳамсуҳбати мо.
Файзулло Бодуров соҳиби як фарзанд буда, тайи солҳои охир дар Маскав мезист. Дӯстонаш дар Русия гуфтанд, ӯ дар шабакаҳои иҷтимоӣ бардошту хотираҳои худро менавишт.
Ҳафтаи гузашта ҷасади як зодаи дигари Хоруғ бо номи Фарид Хайруллобеков аз майдони ҷанг дар Украина ба Маскав оварда шудааст. Сабаби ба ҷанг бурдан ё рафтани ӯ маълум нест.
Моҳи июли имсол дар бораи кушта шудани ду зодаи ноҳияи Ишкошим дар ҷанги Русия дар Украина хабар расида буд.
Теъдоди дақиқи зодагон ё шаҳрвандони Тоҷикистон, ки ба ҷанги Украина ҷалб шудаанд, маълум нест. Танҳо исми бештар аз сад нафари онҳо пас аз фавт ё дар асорат дар Украина расонаӣ шудааст.
Ширкати шаҳрвандони Тоҷикистон дар ҷанги кишварҳои бегона ҷиноят аст. Бо ин вуҷуд, дар ҷанги Русия алайҳи Украина, ки дар моҳи феврали соли 2022 оғоз шуда, сабаби маҳкумиятҳои байнулмилалӣ гардид, зодагон ё шаҳрвандони Тоҷикистон бо тарзҳои гуногун ҷалб мешавад. Онҳоро ба се гурӯҳ тақсим кардан мумкин аст:
- Сарбозону афсароне, ки дар артиши Русия хидмат мекарданд;
- Муҳоҷирони корӣ, ки бо ваъдаи шаҳрвандиву пули калон ба ҷанг ҷалб шуданд;
- Зиндониёни тоҷик, ки дар шароити номаълум ба ҷанг бурда шуданд.
Мақомоти Тоҷикистон дар бештар аз ду соли охир танҳо то сад мавриди ҷалби маҳбусони тоҷикро аз зиндонҳои Русия ба ҷанг тасдиқ карда, вале дар бораи иштироки тоҷикистониҳо дар ҷанги зидди Украина парвандае боз накардаанд.
ДОИШ масъулияти ҳамла ба вазири "Толибон"-ро ба дӯш гирифт
Шохаи "Хуросон"-и гурӯҳи террористии "Давлати исломӣ" (ДОИШ) масъулияти ҳамла ва куштани як мансабдори баландпояи ҳукумати "Толибон"-ро дар Афғонистон ба дӯш гирифт.
Хабаргузории "Франс Пресс" ва DPA-и Олмон ба нақл аз шабакаҳои вобаста ба ДОИШ навиштанд, ки ҳамларо як бомбгузори маргталаб анҷом додааст.
Халилурраҳмон Ҳаққонӣ, вазири муҳоҷирин дар ҳукумати "Толибон", рӯзи 11-уми декабр дар ҳамла ба ҷойи кораш дар Кобул кушта шуд.
Вай бародари Ҷалолиддин Ҳаққонӣ, муассиси шабакаи "Ҳаққонӣ" ва амаки Сироҷиддини Ҳаққонӣ, вазири корҳои дохилии "Толибон" аст.
Амрико соли 2011 барои маълумот дар бораи Халилурраҳмон Ҳаққонӣ 5 миллион доллар ҷоиза эълон карда буд.
Шохаи "Хуросон"-и ДОИШ соли 2014, замоне пайдо шуд, ки гурӯҳи тундрави “Давлати исломӣ” бахше аз қаламравҳои Ироқ ва Сурияро тасарруф карда, “хилофат”-и худхонда эълон карда буд. Давлате, ки ба гуфтаи онҳо бар пояи шариат идора мешуд. Дертар ДОИШ аз тарафи эътилофи низомии таҳти раҳбарии Амрико саркӯб гардид.
Ин гурӯҳ пас аз бозгашти “Толибон” ба қудрат дар бештар аз се соли охир масъулияти чанд ҳамлаи маргборро дар Афғонистон бар уҳда гирифтааст.
Арабистони Саудӣ мизбони Ҷоми ҷаҳонии футбол дар соли 2034
ФИФА ё Федератсияи байнулмилалии футбол Арабистони Саудиро мизбони Ҷоми ҷаҳонии соли 2034 эълон кард.
Қарор рӯзи 11-уми декабр дар шаҳри Сюрих ба далели ҳузур надоштани номзади дигар бе овоздиҳӣ қабул шуд.
Баъзе аз кишварҳои аврупоӣ, аз ҷумла Федератсияи футболи Инглистон (Англия), тасмими ФИФА-ро ба далели вазъи бади ҳуқуқи инсон ва қонунҳои маҳдудкунанда дар Арабистони Саудӣ танқид карданд.
Пас аз мизбонии Қатар дар соли 2022, Ҷоми ҷаҳонии соли 2034 бори дувум дар Ховари Миёна баргузор хоҳад гашт.
Бо дарназардошти он ки Ҷоми ҷаҳонии соли 2026 дар Иёлоти Муттаҳида, Мексика ва Канада ва бозиҳои соли 2030 дар Аврупо, Африқо ва Амрикои Ҷанубӣ баргузор мешавад, танҳо кишварҳои узви Конфедератсияҳои Осиё ва Уқёнусия иҷозат доштанд, ки барои мизбонии соли 2034 дархост диҳанд.
Арабистони Саудӣ тайи солҳои охир ба соҳаи варзиш сармояи зиёде харҷ карда, гуфтааст, ки мизбони хуби ин мусобиқот хоҳад буд.
Орбан ва Зеленский. Раҳбарони Маҷористон ва Украина чӣ гуфтанд?
Виктор Орбан, сарвазири Маҷористон (Венгрия), рӯзи 11-уми декабр дар шабакаи "Х" навишт, ки бо Владимир Путин, президенти Русия, дар бораи шартҳои оташбас ва музокироти сулҳ бо Украина гап задааст.
Владимир Зеленский, раисҷумҳури Украина, дар посух Орбанро танқид кард, ки ба ҷойи пуштибонӣ аз Иттиҳоди Аврупо аз пайи манфиатҳои шахсист.
Ӯ дар шабакаи "X" (Твиттери собиқ) навишт, дар бораи ҷанге, ки Русия алайҳи Украина оғоз кардааст, бе ҳузури Украина ягон музокира намешавад.
Сарвазири Маҷористон дар посух гуфт, таассуфовар аст, ки Зеленский дар остонаи Соли нав оташбас ва табодули теъдоди зиёди зиндониёнро намепазирад.
Пас аз тақрибан се сол ҷанг, талошҳои дипломатӣ дар Брюссел ва Вашингтон барои хотима бахшидан ба таҷовузи Русия ба хоки Украина шиддат мегиранд.
Қарор аст, Доналд Трамп рӯзи 20-уми январи соли 2025 дар мақоми раисҷумҳури Иёлоти Муттаҳидаи Амрико савганд ёд кунад. Ӯ гуфтааст, поён додан ба ҷанг дар Украина аз авлавиятҳои кораш аст.
Русия талош дорад, то замони савгандёдкунии Трамп қаламрави бештари Украинаро тасарруф кунад. Аз сӯйи дигар, Украина низ талош дорад, мавқеи худро дар музокироти эҳтимолии сулҳ таҳким диҳад.
Боздошти як мард, ки аз муҳоҷирони тоҷик ба зӯр пул меситонд
Вазорати корҳои дохилии Тоҷикистон аз боздошти як мард хабар дод, ки ба қавли ин ниҳод, бо озору азияти муҳоҷирони тоҷик машғул будааст.
Шаҳриёр Ҷабборов, сокини 25-солаи шаҳри Душанбе ба он муттаҳам мешавад, ки дар ҳудуди вилояти Маскави Русия ба муҳоҷирони тоҷик фишор оварда бо таҳдид аз онҳо дар ҳаҷми аз панҷ то 20 ҳазор рубл меситонидааст.
Ҷабборов худро ҳамчун муҳофизи муҳоҷирони тоҷик нишон дода, вале ба гуфтаи мақомот, ҳар нафаре, ки аз гапаш берун мерафтааст, бо рафиқони худ бо роҳи фишор ва лату куб аз онҳо пул меситонидааст.
Дар барномаи телевизионии Вазорат, ки рӯзи 11-уми декабр нашр шуд, чанде аз ҷабрдидагон шаҳодат медиҳанд, ки Ҷабборов ба ҳайси нигаҳбон ё "смотряший"- и ин минтақа бояд аз ҳар тоҷик 50 ҳазор рубл мегирифтааст.
Дар сурати муваффақ нашудан, ба гуфтаи ҷабрдидаҳо, Ҷабборов бо лату куб ва таҳдиди марг аз онҳо пул дарёфт мекардааст.
Худи Шаҳриёр Ҷабборов зимни бозпурсӣ, ки маълум нест таҳти кадом шароит сабт шудааст, иқрор мешавад, ки муҳоҷирони тоҷикро аз ҷойи корашон пайдо карда, бо таҳдиду зӯрӣ пул меситонд.
Ҳоло Шаҳриёр Ҷабборов дар ҳабси пешакӣ қарор дошта, нисбаташ парвандаи ҷиноятӣ оғоз шудааст.
Як зодаи Тоҷикистонро аз шаҳрвандии Русия маҳрум карданд
Дар вилояти Сахалини Русия як шаҳрванди 20-солаи Тоҷикистонро, ки худро дар қисми ҳарбӣ сабти ном накард, аз шаҳрвандии Русия маҳрум карданд. Дар ин бора дафтари матбуоти Вазорати корҳои дохилии Русия хабар додааст.
Номи ин ҷавон оварда нашудааст, аммо гуфта мешавад, ки ӯ ҳанӯз се моҳ қабл дар моҳи августи соли равон шаҳрвандии Русияро гирифта буд. Қарор дар бораи бекор кардани шаҳрвандии ӯро Раёсати муҳоҷирати Вазорати корҳои дохилӣ содир кардааст.
"Шиносномаи Русия, ки ба ин ҷавон дода шудааст, беэътибор дониста шуд ва ӯ муваззаф аст, қаламрави кишвари моро тарк кунад, зеро вай асосҳои қонунии будубошро дар он ҷо аз даст додааст", - омадааст дар изҳороти мақомоти Русия.
Моҳи августи соли 2024 раисиҷумҳури Русия Владимир Путин қонун дар бораи бақайдгирии ҳатмии ҳарбӣ пас аз гирифтани шаҳрвандии Русияро имзо кард. Риоя накардани ин талабот асос барои маҳрум кардан аз шаҳрвандии Русия мегардад. Ин қонун асосан ба муҳоҷирон аз Осиёи Марказӣ дахл дорад.
Тирамоҳи соли гузашта раиси Кумитаи тафтишоти Федератсияи Русия Александр Бастрикин пешниҳод кард, то муҳоҷироне, ки дар ҷанг алайҳи Украина иштирок кардан намехоҳанд, аз шаҳрвандӣ маҳрум карда шаванд.
Пас аз ин изҳороти раиси Кумитаи тафтишот, рейдҳо алайҳи муҳоҷирон дар Русия бештар шуд. Нерӯҳои амниятӣ муҳоҷирони шаҳрвандии Русия доштаро боздошт карда, дар артиш сабти ном кардаанд.
Моҳи декабри соли гузашта гузоришҳо ба нашр расида буданд, ки шаҳрвандони хориҷӣ барои саркашӣ аз сабти номи ҳарбӣ аз шаҳрвандии Русия маҳрум шудаанд.
Осорхонаи Айнӣ дар феҳристи маконҳои сайёҳии Бухоро
Осорхонаи Садриддин Айнӣ, сардафтари адабиёти муосири тоҷик, дар Соктареи ноҳияи Ғиждувон ба феҳристи маконҳои сайёҳии вилояти Бухоро дохил шудааст.
Дар ин бора сафорати Тоҷикистон дар шаҳри Тошканд рӯзи 11-и декабр хабар дод.
“Ин иқдом дар арафаи ҷашни 150-солагии фарзанди барӯманди халқи тоҷик устод Садриддин Айнӣ тӯҳфаи муносиб мебошад,” – навишт сафорат дар саҳифааш дар Фейсбук.
Ба иттилои манбаъ, раисҷумҳури Узбекистон Шавкат Мирзиёев қарорро дар ин замина рӯзи 5-уми декабр имзо кардааст.
Радиои Озодӣ соли 2023 дар бораи вазъи осорхонаи Садриддин Айнӣ дар Соктаре гузориш дода буд.
Садриддин Айнӣ муаллифи даҳҳо асари манзуму мансури таърихист, ки дар нашриёти Тоҷикистон чанд сол пеш онро дар Куллиёти 15-ҷилдӣ мунташир карданд.
Моҳи сентябри соли 1998 бо фармони раисҷумҳури Тоҷикистон ба ӯ унвони Қаҳрамони Тоҷикистон дода шуд ва аксаш бар рӯйи пули 5 сомонӣ ҷой гирифт. Дар Узбекистон ҳам ӯро ҳамчун саромади адабиёти навини ин кишвар мешиносанд.
Ба фарқ аз осорхонаи Айнӣ дар Самарқанду Бухоро, соли 2021 тибқи нақшаи шаҳрсозӣ қарор буд осорхонаи Садриддин Айнӣ дар Душанбе вайрон гардад. Иддае аз равшанфикрони тоҷик ва масъулони чаҳор созмони эҷодӣ бо пойфишорӣ, монеи вайрон кардани ин хона-музей гардиданд.
Ҷасади шаш узви як оиларо дар Конибодом дафн карданд
Шаш узви оилаи Неъматовҳоро рӯзи 11-уми декабр дар деҳаи Шӯробқалъаи Конибодом (вилояти Суғд) дафн карданд.
Ҷасади Наимҷон Неъматови 37-сола, ҳамсараш Нафиса Неъматоваи 33-сола ва фарзандонаш Аминаи 13-сола, Фотима ва Зӯҳрои 10-сола ва Муҳаммадюсуфи 2-сола шаби ҳаштуми декабр дар хонаашон ёфт шуд.
Ба нақли пайвандон, мақомот пештар онҳоро барои санҷиши пизишкиву додгоҳӣ ба шаҳри Хуҷанд бурда буданд.
Бо гузашти се рӯз мақомот на хабари ҳодисаро доданд, на тафсилоти марги мармузи онҳоро ошкор карданд. Сокинон дар минтақа нигаронанд.
Як манбаи боварбахш дар Вазорати корҳои дохилии Тоҷикистон рӯзи чоршанбе гуфт, ки таҳқиқ ба зиммаи муфаттишони Додситонӣ гузошта шудааст.
Куштори хонаводаи Неъматовҳо дар ҳолест, ки шаҳри Конибодом бештар аз як сол боз бо чунин ҳодисаҳо дар сархати расонаву шабакаҳои иҷтимоӣ қарор гирифтааст. Дастикам чанд аъзои шаш оила дар ин минтақа бо аломатҳои қасдан ба ҳалокат расондан ёфт шудаанд.
Масъулони мақомоти маҳаллӣ мегӯянд, қисме аз чунин ҳодисаҳо ба ҷанҷолҳои хонаводагӣ рабт доштанд ва таҳқиқи дигар ҳодисаҳо идома дорад. Дар як маврид аз даст доштани як нафар ё гурӯҳи беруна суҳбат шуда буд.
Қонуни баҳсбарангез қабул шуд. Мушкили нави муҳоҷирон дар Русия
Думаи давлатии Русия қонуни баҳсбарангезеро қабул кард, ки таҳсили фарзандони муҳоҷиронро дар мактабҳои Русия манъ мекунад.
Дар ин бора Вячеслав Володин, раиси Думаи давлатӣ, рӯзи 11-уми декабр дар Телеграм хабар дод.
Иҷрои қонуни нав бояд аз аввали моҳи апрел сар шавад. Бар асоси он, фарзандони муҳоҷирон бе донистани забони русӣ ба мактабҳо пазируфта намешаванд.
Аз 410 вакил фақат як нафар ба зидди қонун рой дода, боқимонда аз он тарафдорӣ кардаанд. Володин гуфтааст, ҳангоми қабул ба мактаб минбаъд дар баробари донистани забони русӣ, қонунӣ будани ҳузури кӯдакон дар Русия ҳам санҷида мешавад
Пештар Думаи давлатии Русия бо нашри натиҷаҳои як таҳлил гуфта буд, 41 дар сади фарзандони муҳоҷирон дар ин кишвар бо забони русӣ мушкил доранд. Аммо дар ду минтақаи Русия ба қабули чунин қонун зид баромада, гуфта буданд, ки кӯдакони дур аз мактаб ба тоифаи ҷинояткорон хоҳанд пайваст.
Муҳоҷирони зиёд аз кишварҳои Осиёи Марказӣ, аз ҷумла Тоҷикистон, чанд моҳ боз аз он шикоят доранд, ки дархости онҳо барои қабули фарзандонашон ба мактабҳои Русия рад мешавад.
Як зани муҳоҷир аз Тоҷикистон моҳи ноябр бо муроҷиат ба Радиои Озодӣ гуфт, вақте хост, фарзандонашро дар Самара аз як мактаб ба мактаби дигар барад, онҳоро қабул накарданд ва ба ӯ дастур доданд, ки зудтар бо кӯдакон Русияро тарк кунад.
Русия мизбони бештар аз 1 миллион муҳоҷири кории тоҷик аст ва қонуни нав зиндагии ҳазорон нафари онҳоро, ки мехоҳанд фарзандонашонро аз худ дур накунанд, сахттар хоҳад кард.
Навор дар Инстаграм:
Дархости як эътилофи мухолифини тоҷик аз ВКХ-и Фаронса
Як эътилофи мухолифи ҳукумати Тоҷикистон аз масъулони Вазорати корҳои хориҷии Фаронса хостааст, ки дар мулоқот бо ҳамтоёни худ аз Душанбе вазъи зиндониҳои сиёсӣ, саркӯби мухолифону фаъолон, тақвияти фасод ва ҳукумати хонаводагиро “ба таври ҷиддӣ” дар миён гузоранд.
Дидору суҳбати ҳайатҳои ВКХ-и Тоҷикистон ва Фаронса рӯзи 12-уми декабр дар Порис (Париж) дар назар аст.
Паймони миллии Тоҷикистон, эътилофи се созмони мухолиф, мегӯяд, номаашро дар ин бора рӯзи 10-уми декабр ба Матие Комб (Matthieu Combe), муовини мудири шуъбаи Қафқоз ва Осиёи Марказӣ дар ВКХ-и Фаронса, фиристод.
Матие Комб дар моҳи ноябри имсол барои ҳамоҳанг кардани нишаст ба Тоҷикистон рафта буд.
"Созмонҳои муътабари ҷаҳонӣ режими Раҳмонро ҷузъи даҳгонаи хашинтарин ҳукуматҳои олам шинохтаанд, ки ба мухолифин, дигарандешон ва фаъолони ҷомеъа бераҳмтарин муносибатро раво мебинад. Кишвари демократие мисли Фаронса набояд ин воқеъиятро дар робитаҳои худ бо чунин режим нодида бигирад," – гуфта шудааст дар бахше аз нома.
Намояндагони мухолифон дар гузашта низ аз кишварҳои аврупоӣ хоста буданд, ки ҳангоми суҳбат бо мақомоти Тоҷикистон масъалаи ҳуқуқи башар ва зиндониҳоро бардоранд, вале аксар вақт аз натиҷааш гузориш дода намешавад.
Фаронса як шарики муҳими Тоҷикистон дар қаламрави Иттиҳоди Аврупо дониста мешавад. Ин кишвар соли 2008 барои сохтмони терминали Фурудгоҳи байнулмилалии Душанбе 49 миллион евро ёрӣ кард.
То соли 2014, давоми 12 сол, дар доираи амалиёти зиддитеррористии НАТО дар Афғонистон контингенти 170-нафарии низомиёни фаронсавӣ дар фурудгоҳи Душанбе мустақар буд.
Соли 2016 дар Душанбе маркази савдои “Ашан”, нахустин гипермаркети фаронсавӣ дар Осиёи Марказӣ боз шуд. Вале мизони додугирифти ду кишвар ҳамоно дар сатҳи ночиз мемонад.
Халилураҳмон Ҳаққонӣ, вазири Толибон дар Кобул кушта шуд
Халилураҳмон Ҳаққонӣ, вазири муҳоҷирин дар ҳукумати Толибон, дар Кобул кушта шуд.
Ду манбаъ дар ҳукумати Толибон, ки нахостанд номашон фош шавад, ба Радиои Аврупои Озод/Радиои Озодӣ таъйид карданд, ки Халилураҳмон Ҳаққонӣ рӯзи 11-уми декабр дар як таркиш дар маҳалли кораш ҷон бохт.
Тибқи гузоришҳо, дар ин ҳодиса ҳудуди 10 нафар кушта шудааст.
Ҳукумати Толибон расман дар ин маврид чизе нагуфта, ҳеч гурӯҳ то ҳол масъулияти ҳодисаро напазируфтааст.
Халилураҳмон Ҳаққонӣ амаки Сироҷиддин Ҳаққонӣ, вазири корҳои дохилии ҳукумати Толибон ва яке аз мақомҳои баландпояи ин гурӯҳ ба шумор мерафт.
Ӯ нахустин узви баландпояи ҳукумати Толибон аст, ки пас аз бозгашти ин гурӯҳ ба қудрат дар як таркиш кушта мешавад.
Вазорати молияи Амрико дар моҳи феврали соли 2011 Халилураҳмон Ҳаққониро дар феҳристи террористҳои байнулмилалӣ ҷой дод ва як ҷоизаи 5-миллиондолларӣ барои маълумоте, ки боиси боздошти ӯ шавад, таъйин кард.
Вазорати корҳои хориҷии Амрико ҳам барои маълумоте, ки дар мавриди боздошти Халилураҳмон Ҳаққонӣ мадад кунад, панҷ миллион доллар ҷоиза эълон карда буд.
Хоманаӣ Амрико ва Исроилро масъули суқути Башор Асад донист
Оятуллоҳ Алии Хоманаӣ, раҳбари олии Эрон, Амрико ва Исроилро масъули суқути режими Башор Асад дар Сурия хонд.
Вай рӯзи 11-уми декабр гуфт, "як кишвари ҳамсояи Сурия" низ дар ин рӯйдод нақши ошкор дорад.
Хоманаӣ аз кишвари ҳамсояи Сурия ном набурд, аммо ба навиштаи хабаргузории DPA-и Олмон, раҳбари олии Эрон зоҳиран Туркияро дар назар дорад.
"Бале, як давлати ҳамсояи Сурия нақши рӯшан дорад... аммо тавтегар, мағзи мутафаккир ва маркази фармондеҳӣ дар Амрико ва режими саҳюнистӣ ҳастанд," – афзуд ӯ.
Эрон ва Русия аз пуштибонҳои асосии Башор Асад дар Сурия буданд.
"Ҳайат Таҳрир аш-Шом" (Амрико ва баъзе аз кишварҳои дигар террористӣ медонанд) ва муттаҳидонаш, ки баъзе аз онҳо бо Туркия иртибот доранд, рӯзи 8-уми декабр Башор Асадро аз қудрат дар Сурия барканор карданд.
Башор Асад аз соли 2000-ум то 8-уми декабри 2024 дар қудрат буд. Пеш аз он, падараш Ҳофиз Асад, 29 сол бар Сурия раҳбарӣ кардааст.
Дар ҳамлаи Русия ба як шифохонаи Украина 7 кас кушта шуд
Шумораи кушташудагон дар ҳамлаи Русия ба як шифохона дар шаҳри Запорожйеи Украина ба шаш нафар расидааст.
Дар ин бора Хадамоти ҳолатҳои фавқулодаи Украина рӯзи 11-уми декабр хабар дод.
Манбаъ гуфтааст, дастикам 22 нафар захмӣ шуданд ва амалиёти наҷот идома дорад.
Волии Запорожйе дар Телеграм навишт, ки ду занро аз зери вайронаҳо берун оварда, дар бемористон ҷой карданд.
Иван Федоров афзуд, гумон меравад, чаҳор нафари дигар то ҳол зери харобаҳо ҳастанд.
Русия дар оғози фасли зимистон ҳамлаҳоро бо мушаку ҳавопаймоҳои бесарнишин ба шаҳрҳо ва зербунёдҳои энергетикии Украина бештар кардааст.
Ин кишвар дар моҳи феврали соли 2022 бедалел ба хоки Украина таҷовуз кард. Даргирӣ аз он замон идома дорад.
Аз донишҷӯёни туркман хостанд, ки Соли навро ҷашн нагиранд
Дар Туркманистон аз донишҷӯён ва толибилмон забонхат гирифтаанд, ки Соли нави мелодиро ҷашн намегиранд.
Тавре хабарнигори "Озодлик" хабар медиҳад, аз донишҷӯён дар бораи ҷашн нагирифтани шаби Соли нав дар қаҳвахона ё хона ва инчунин барои сайру гашт ба шаҳр набаромадан, забонхат гирифтаанд.
Аммо мақомот аз донишҷӯён талаб кардаанд, ки дар чорабиниҳое, ки мақомот бахшида ба ин рӯзҳо ташкил мекунанд, ширкат кунанд. Дар сурати риоя нашудани ин талабот, ба донишҷӯён таҳдид шудааст, ки онҳо аз донишгоҳ ихроҷ карда мешаванд.
Қаблан хабарнигорони Радиои Озодӣ хабар дода буданд, ки дар мактабҳои таҳсилоти умумии шаҳри Ишқобод ҳанӯз моҳи ноябр хонандагон дар бораи манъи таҷлили Соли нав огоҳонида шуданд.
Муаллимон бо такя ба фармоне аз Вазорати маориф, ба донишҷӯён дар бораи манъи ташкили ҷамъомад бо дӯстону наздикон иттилоъ доданд.
Бино ба гузоришҳои расонаҳои расмии Туркманистон, омодагиҳо ба таҷлили Соли нав дар авҷ буда, қарор аст чароғҳои Арчаи асосӣ дар ин кишвар рӯзи 14-уми декабр фурӯзон шаванд.
Дар Туркманистон ҳама идҳо, аз ҷумла Соли нав таҳти назорати шадиди мақомот таҷлил мешаванд.
Пешниҳоди ҷорӣ кардани виза бо Русия аз сӯи вакили узбек
Алишер Қодиров, роҳбари ҳизби "Эҳёи миллӣ" ва вакили порлумони Узбекистон пешниҳод кардааст, ки қонунҳои муҳоҷират дар ин кишвар бозбинӣ шаванд ва миёни кишварҳои Осиёи Марказӣ бо Русия низоми раводид ҷорӣ гардад.
Ӯ дар телеграмканали худ ба ҷонибдорӣ аз таҳкими қонунгузории муҳоҷират дар Русия баромад карда, аз ҳамаи кишварҳои Осиёи Марказӣ хостааст, ки барои ҷорӣ шудани низоми раводид бо Русия пуштибонӣ кунанд.
Қодиров ин изҳороташро дар пайи пешниҳоди Леонид Слутский, раиси ҳизби либерал-демократии Русия, барои таҳияи "Кодекси муҳоҷирон", баён кард.
Ба таъкиди ин вакили узбек, "дар пасманзари бесуботӣ ва эҳтимоли афзоиши ҷиддии муҳоҷирони корӣ, ки дар ояндаи наздик фаро мерасад, на танҳо Узбекистон, балки тамоми минтақаҳои Осиёи Марказӣ бояд ташаббусҳои сиёсатмадорони Русияро дар бораи вуруди муҳоҷирон бо виза дастгирӣ кунанд".
Ҳизби "Эҳёи миллӣ” яке аз панҷ ҳизби сиёсии расман сабтиномшуда дар Узбекистон буда, аз рӯи шумораи курсиҳо дар палатаи поёнии парлумони Узбекистон дар ҷои дуюм аст.
Тазоҳурот дар Олмон бо талаби баргардондани Дилмуроду Абдуллоҳ
Гурӯҳе аз зодагони Тоҷикистон дар Олмон бо баргузории тазоҳурот аз мақомоти ин кишвари аврупоӣ хостаанд, ки Дилмурод Эргашев ва Абдуллоҳи Шамсиддин, ду паноҳҷӯйи ихроҷшудаи тоҷикро аз Душанбе баргардонанд.
Тазоҳурот рӯзи 10-уми декабр дар назди Вазорати кор бо муҳоҷирони Дортмунд баргузор шудааст.
Фарҳод Одинаев, яке аз ширкатдорон, гуфт, онҳо аз шеваи ихроҷи Дилмурод Эргашев ва Абдуллоҳи Шамсиддин аз Олмон ва бархӯрди мақомоти Тоҷикистон бо онҳо ибрози нигаронӣ карданд.
“Баъзе аз ҳомиёни ҳуқуқ дар Олмон низ дар тазоҳурот ширкат ва суханронӣ доштанд. Онҳо низ талаб карданд, ки Берлин ҳардуи онҳоро аз Тоҷикистон бозпас биорад,” -- гуфт ӯ.
Бо вуҷуди ҳушдорҳо аз эҳтимоли шиканҷаву ҳабс шуданаш дар Тоҷикистон, мақомоти Олмон фаъоли мухолифон, узви пешини “Гурӯҳи 24”, Дилмурод Эргашевро моҳи октябри 2024 аз хоки ин кишвари аврупоӣ берун карданд.
Ба гузориши Дидбони Ҳуқуқи Башар (Human Rights Watch), ҳоло ӯ дар Душанбе аст ва дар ҳабси пешакӣ.
Мақомоти Олмон дар моҳи январи соли 2023 Абдуллоҳи Шамсиддин, писари яке аз фаъолони ҳизби дар Тоҷикистон мамнӯи наҳзати исломиро ба Душанбе фиристода буданд. Ба гузориши Дидбони Ҳуқуқи Башар, ӯ ба ҳафт сол зиндон маҳкум шудааст.
"Ҳукумат созишномаро бо Шабакаи Рушди Оқохон дароз накард"
Ҳукумати Тоҷикистон муҳлати созишнома бо Шабакаи Рушди Оқохон (АКDN)-ро, ки 31-уми октябри 2024 ба охир расид, дароз накардааст.
Чаҳор манбаи огоҳ дар Хоруғ, маркази Вилояти Мухтори Кӯҳистони Бадахшон, рӯзи 9-уми декабр ба Радиои Озодӣ гуфтанд, "агар ин қарор ниҳоист, пас, ба маънои маҳрум шудани Шабакаи Оқохон аз мақом ё статуси дипломатӣ аст".
Созмон аз соли 1992 дар Тоҷикистон фаъолият дорад.
Мақомоти Тоҷикистон сабаби дароз накардани муҳлати созишномаро нагуфтанд. Мавқеи Шабакаи Рушди Оқохон (АКDN) низ то ҳол маълум нест.
Торнамои "Pamir Inside" (ҳаводиси Вилояти Мухтори Кӯҳистони Бадахшонро бозтоб медиҳад) бо такя ба манбаъҳои худ дар охири моҳи ноябр навишт, ки Қозидавлат Қоимдодов, раиси Шабакаи Рушди Оқохон дар Тоҷикистон, бо Сироҷиддин Муҳриддин, вазири корҳои хориҷӣ мулоқот дошт, "вале посухи мусбат нагирифт". Ин мулоқот дар моҳи октябри имсол гузаштааст.
Як манбаи Радиои Озодӣ дар Хоруғ (номаш ба далели амниятӣ фош намешавад) рӯзи 9-уми декабр гуфт, "созишнома барои Шабакаи Рушди Оқохон мақоми дипломатӣ медод ва тамоми созмонҳои вобаста ба он зери як чатр фаъолият мекарданд ва аз тартибҳои бюрократӣ озод буданд."
"Шарикони рушд барои доштани чунин зарфиятҳо барои татбиқи лоиҳаҳо дар Тоҷикистон бештар вақт Шабакаи Рушди Оқохонро интихоб мекарданд. Ҳоло кор душвор хоҳад шуд, чун ҳам назорат зиёд мешавад ва ҳам вақти зиёд сарф мегардад. Оҷонсиҳои Оқохон аз ин ба баъд ҳамчун созмонҳои ғайриҳукуматӣ дар Тоҷикистон фаъолият хоҳанд кард," -- шарҳ дод ӯ.
Кӯшиши мо барои суҳбат бо Қозидавлат Қоимдодов, раиси Шабакаи Рушди Оқохон дар Тоҷикистон, натиҷа надод. Ӯ дар суҳбати қаблӣ, 19-уми апрели соли 2019, гуфта буд, ки созмони онҳо "барои кулли мардуми Тоҷикистон хидмат мекунад" ва саҳмаш дар рушди ҷумҳурӣ "монанди Бонки Ҷаҳонӣ, Бонки Осиёии Рушд ва ниҳодҳои дигари байнулмилалист".
Шабакаи Рушди Оқохон 32 сол боз дар Тоҷикистон амал мекунад. 3500 корманд дорад ва барномаҳои он ба рушди минтақаҳои кӯҳӣ ва мусоидат дар пешрафти иҷтимоиву иқтисоди Тоҷикистон равона шудааст. Шабака танҳо дар соли 2018 дар Тоҷикистон 107 миллиону 144 ҳазор сомонӣ сармоягузорӣ кардааст.
Шабакаи Рушди Оқохон, ки раҳбари куллаш Шоҳзода Карим Оқохон, пешвои исмоилиёни ҷаҳон аст, аз соли 2022, пас аз саркӯби хунини норозиён дар Хоруғу Рӯшон, аз чанд бинои худ дар Тоҷикистон маҳрум гашт.
Моҳи сентябри соли 2023 ба ҷойи Литсейи Оқохон дар шаҳри Хоруғ "Литсей барои хонандагони болаёқат" ба кор сар кард. Литсейи Оқохон 25 сол фаъол буд.
Додситонии Вилояти Мухтори Кӯҳистони Бадахшон хост, ки як қарори раиси шаҳри Хоруғ (аз соли 2018) ва иҷозатномаи давлатӣ (аз соли 2019) дар пайванд ба Маркази тиббии Оқохон беэътибор дониста шавад. Маркази тиббии Оқохон (Aga Khan Medical Centre) ҷузъе аз Хадамоти Оқохон дар мавриди тандурустӣ (Aga Khan Health Service) аст. Он соли 2018 дар Хоруғ бо маблағи 25 миллион доллар сохта шуд.
Замини Донишгоҳи вобаста ба Шабакаи Оқохон ва меҳмонхонаи “Серена” дар Хоруғ низ ба ихтиёри давлат гузаронда шуданд. Боғи марказии фароғатии шаҳри Хоруғ, ки зери сарпарастии Бунёди Оқохон буд, ба моликияти давлатӣ табдил дода шуд.
