Бозии санҷишии дастаи “Истиқлол” дар доираи ҷамъомади таълимиву тамринии қаҳрамони Тоҷикистон дар Минск бо “Неман”, ки тими лигаи олии футболи Беларус мебошад, дар варзишгоҳи ин бошгоҳ дар шаҳри Гродно доир шуд.
Леонард Гвед, бозигари мизбонон, дар дақиқаи 16 -ум ҳисобро кушод. Ҳамдастааш Гулжигит Алиқулов дар дақиқаи 45-ум тӯбро аз пеналти ё ҷаримаи 11-метрӣ ба нишон расонда, ҳисобро дучанд кард. Голи севуми беларусиҳоро Алиқулов дар дақиқаи 49-ум зад.
Содиқҷон Қурбонов, бозигари “Истиқлол”, дар дақиқаи 63-юм ҳисобро тағйир дод (3:1). Голи дувуми душанбегиҳоро Эҳсони Панҷшанбе дар дақиқаи 89-ум зад (3:2).
«Истиқлол» бозии дувуми санҷишии худро дар Минск 16-уми июл баргузор мекунад.
Бозии санҷишӣ
«Неман» (Гродно) - «Истиқлол» (Душанбе) - 3:2
Голҳо: Леонард Гвед, 16 (1:0). Гулжигит Алиқулов, 45 - аз пеналтӣ (2:0). Гулжигит Алиқулов, 49 (3:0). Содиқҷон Қурбонов, 63 (3:1). Эҳсони Панҷшанбе, 89 (3:2).
«Истиқлол»: Муҳриддин Ҳасанов, Содиқҷон Қурбонов, Кейта Сузуки (Аҳтам Назаров, 56), Дарко Илиески (Амирбек Ҷӯрабоев, 53), Павел Назаренко, Мурило Соуза (Алексей Ларин, 59), Алишер Ҷалилов, Эҳсони Панҷшанбе, Ҳамадонӣ Камолов (Табрез Исломов, 82), Шервонӣ Мабатшоев (Рустам Соиров, 65), Манучеҳр Ҷалилов (Меҳрон Мадаминов, 68).
13-уми июл. Гродно (Беларус). Варзишгоҳи «Неман».
Бояд зикр намуд, дар қаҳрамонии футболи Тоҷикистон равзанаи гузариши тобистона ҷараён дорад. Давраи бақайдгирӣ, ки дар давоми он бошгоҳҳои ватанӣ метавонанд гузаришҳои футболбозонро сабти ном кунанд, то рӯзи 28-уми июл идома хоҳад кард.
“Истиқлол” барои пурзӯр кардани ҳайати даста бо бархе аз футболбозони хориҷӣ шартнома баст. Ҳимоятгар аз Македонияи Шимолӣ Дарко Илиески аз ҷумлаи онҳост. Шартномаи ҳамкорӣ миёни ин футболбоз ва дастаи «Истиқлол» то охири мавсим ба имзо расид.
Илиески 8-уми июл ба даста ҳамроҳ гашта, айни замон дар ҷамъомади таълимию тамринии бошгоҳ қарор дорад. Вай 14-уми октябри соли 1995 таваллуд шудааст. Қадаш – 188 см, вазнаш – 78 кг. Ба ҳайси футболбози касбӣ дар тимҳои «Шкупи», «Копер», «Струга» ва «Пелистер» ҳунарнамоӣ кардааст. Қаҳрамони Македонияи Шимолӣ дар ҳайати тими «Струга» дар мавсими 2022-2023 мебошад.
Легионери дигари нави “Истиқлол” - ҳимоятгари 29-солаи беларус Павел Назаренко - аз тими «Гомел» ба «Истиқлол» гузашт. Муҳлати қарордоди ӯ бо бошгоҳи “Истиқлол” то охири мавсими соли 2024 аст.
Назаренко дастпарвари бошгоҳи «Динамо»- и Минск буда, дар ватани худ дар дастаҳои «Слутск», «Витебск» ва «Городея» ҳунарнамоӣ кардааст. Ӯ ҳамчунин дар қаҳрамонии Қазокистон дар ҳайати тимҳои «Жетису» ва «Акжаик» бозӣ кардааст.
Дарвозабон Никола Стошич баъди танаффуси чорсола дубора пероҳани “Истиқлол”-ро ба бар мекунад. Стошич, ки қаблан дар солҳои 2013-2020 дар ҳайати «Истиқлол» ҳунарнамоӣ мекард, ба даста баргашт. Муҳлати созишномаи меҳнатӣ бо ӯ ду солро дар бар мегирад. Стошичи 30-солаи сербиягӣ, ки ҳамзамон шаҳрвандии Тоҷикистонро пазируфтааст, дар рӯзи аввали ҷамъомади таълимиву тамринӣ дар Минск ба «Истиқлол» ҳамроҳ шуд ва дар аввалин тамрини даста иштирок кард.
Бошгоҳи “Истиқлол” шартномаи ҳамкориро бо се футболбози легионер тамдид накард. Бо ба анҷом расидани муҳлати қарордод дастаро ҳимоятгари хорватӣ Иван Новоселетс, нимҳимоятгар аз Босния ва Ҳерсоговина Денис Беганович ва ҳимоятгари сербиягӣ Славко Лукич тарк намуданд, ки фаъолияти худро дар дигар дастаҳо давом медиҳанд.
Ба ғайр аз ин, бошгоҳи “Истиқлол” бо ризоияти тарафайн шартномаи ҳамкориро бо ду футболбози хати ҳимоя ва нимҳимоя катъ кард:
Алиҷон Кароматуллозода ва Кабир Салимшоев фаъолияти варзишии худро дар бошгоҳҳои дигар идома хоҳанд дод.
Дар зимн, “Истиқлол”, ки пас аз анҷоми марҳилаи аввали лигаи олӣ дар ҷадвали мусобиқот бо касби 33 имтиёз аз 11 бозӣ дар мақоми аввал аст, дар даври 13-ум рӯзи 10-уми август дар варзишгоҳи «Пахтакор»-и шаҳри Бохтар бо тими “Вахш” рақобат мекунад.
Ин бозии 350-уми “Истиқлол” дар қаҳрамонии футболи Тоҷикистон аст. Дар ҳамин ҳол дар ҳисоби «Истиқлол» 349 бозӣ дар лигаи олӣ ба қайд гирифта шудааст: пирӯзӣ - 273, мусовӣ - 53, бохт - 23. таносуби тӯбҳо - 1011:207.